الفريزر صديقى

السلام عليكم ورحمة الله

انا عارفة ان كتير من الأمهات محتاجين لأى مساعدة ممكنة فى المطبخ و أنا عندى طريقة بتسهل عليا شوية حياتى وهى الفريزر . أول حاجة لازم تعرفوها ان الاكل لو اتجمد صح طعمه مش هيتغير أو نقول ( أصله أكل مجمد ) وكل حاجة ليها طريقتها فى التجميد. بالنسبة ليا أول حاجة بتسهل لى وقتى فى المطبخ هى الفريزر كمان بتوفر لى فى فلوسى و مجهودى وتعالو نحسبها:

1. لو جايين متأخر من برة وتعبانة أو مفيش مزاج تطبخى أول حاجة هتفكرى فيها انك تجيبى أكل جاهز وطبعا ده بيكلفك .
2. الساعة اللى هتقفى تطبخى فيها أكلة واحدة تطبخى أكلتين تقريبا فى نفس الوقت وبنفس المجهود .
3. لو انتى تعبانة لا قدر الله أو مش موجودة فى يوم ممكن جوزك أو لو عندك أولاد كبار شوية يسخنو الأكل وياكلو.
4. كمان لو جايلك ضيوف وعاوزة تبهريهم بأكلك بس ممكن تحتاجى يومين عشان تخلصى الأصناف اللى هتعمليها , ممكن تعملى حاجة أو اتنين وتجمديهم حتى لو قبلها بأسبوع.
5. مش هنرمى أى حاجة أبدا.

بالنسبة للناس اللى خايفة تجرب هقولكم على حاجات ممكن تبدأو بيها زى: اللحمة المفرومة: تجيبى كمية أكبر شوية من استعمالك العادى يعنى ممكن 2 أو 3 كيلو وتعصجيهم عادى بالبصل والملح والفلفل والبهارات وتسيبيهم يبردو وبعدين تقسميهم فى أكياس على قد كل طبخة وتجمديهم , ولما تحتاجى هتخرجى الكيس قبلها بيوم من الفريزر وتحطيه على الرف فى التلاجة والصبح تستعمليه عادى. الشوربة أو المرقة: لما بنطبخ اللحمة او الفراخ أحيانا بيفيض مننا شوربة ومحدش بيرضى يشربها تانى يوم , مهما كانت الكمية صغيرة حطيها فى كيس وجمديها بس متنسيش تكتبى عليها هى شوربة لحمة وللا فراخ ويا ريت كمان التاريخ ولما تتجمع عنك الكمية المناسبه استخدميا مع أى أكلة , رز , خضار , شوربات ,محشى , بشاميل وهكذا. الكيك والمافن: أنا بحب الخبز يعنى أعمل كيك كتير و مافن وكب كيك وحاجات من دى وطبعا طول ما هى قدامى فى المطبخ أو فى الثلاجة مش ببطل أكل وأنا رايحة و و أنا جاية وطبعا افضل أتخن, فأحسن حاجة انها أول ما تبرد من الفرن الكيك يتقطع ويتجمد فى كيس كبيرأو ألف كل قطعة فى بلاستيك أو فويل وبعدين فى الكيس الكبير.سهلة جدا مع المافن والكب كيك لأنهم أساسا مخبوزين واحدات فى ورق المافن ف بحطهم علطول فى كيس. الموز: أول ما يبدأ لونه يسود وأولادى استحالة ياكلوه طبعا بحطهم فى كيس وأرميهم.....فى الفريزر طبعا مش قلنا مش هنرمى حاجة. أستعملهم بقى فى العصير باللبن أو فى المافن أو لو انتى رايقة بقى زيي ممكن تقطعيه حلقات وترصيهم فى صينية ( اتأكدى الأول ان باب الفريزر هينفع يتقفل ) وتحطيها فى الفريزر ساعة وبعدها تشيليهم من الصينية فى كيس وتسيبيهم فى الفريزر وتستعمليهم للولاد فى الصيف فى العصير بدل مكعبات الثلج. نصيحتى بقى لما تجمدى الموز سليم بيتغير لونه ويبقى أسود بس متخافيش ده طبيع والموز بيفضل زى ما هو مش بيحصل له حاجة بس الأحسن متخرجيهوش قدام جوزك أو أولادك عشان يرضو يشربو العصير هههههههههه. الفراولة: بتغسليها وتصفيها كويس وتشيلى الجزء الأخضر وترصيها فى الصينية بنفس طريقة الموز وتجمديها ودى أحسن طريقة لتجميد الفراولة من غير ما تمسك فى بعضها وبتستعمليها برده فى العصير أو زى ما تحبيها. آخر حاجة البسلة: تقشريها وتغسليها وتنزليها فى مايه بتغلى 3 دقايق وتخرجيها وتصفيها وتشطفيها بمايه باردة ولما تتصفى كويس تجمديها بنفس طريقة الفراولة .أحلى حاجة انك ممكن تحطى كمية كبيرة فى كيس وتستعملى منه حسب الطلب وتقفليه تانى لأنها عمرها ما هتمسك فى بعض.  
 

ملحوظة: الصور المستخدمة للتوضيح بحثت عنها فى Google لكن باقى الموضوع خبرات شخصية.

اعلان سريع

السلام عليكم ورحمة الله وبركاته

أنا يشرفنى ويسعدنى أن أعلن و أبارك للعزيز الغالى (زوجى المصون) أدهم على إنشاء مدونته الأولى (غيرة بقى هنقول ايه). المدونة اسمها مالك الحزين.

حاولو تتابعوها و أكيد مش هتندموا لأن أدهم شخصية لذيذة ومثقف جدا (بشكل مزعج), وكمان أكييييد ثائر جدا جدا.

مبروك يا حبيبى وتمنياتى بالتوفيق

آه ....من كونكر

السلام عليكم ورحمة الله

يا ترى تعرفوا لعبة كونكر Conquer ؟ أنا للأسف أعرفها, بس مش أنا اللى بلعبها, أحمد ابنى هو اللى بيلعبها .أحمد عمره 5سنين ومدمن اللعبة دى . بجد مدمنها وعنده كل علامات الإدمان أو الهوس:

• بيفكر فيها طول اليوم .
• بينام يحلم بيها .
• يعرف كل حاجة عنها .
• ممكن يحصل له حالة بكاء مفاجأة إذا فصل النت وهو بيلعب .

أنا بسمع من أحمد تعبيرات وكلام عجيب ممكن يقول:

• انا عاوز أجيب 5 مواتير لسة (أكتر جملة بسمعها)
• البت بتاعتى ماتت (متفهموش غلط دى واحدة من الشخصيات اللى بيلعب بيها)
• خلاص يا ماما هقوم بس لما أكمل الليفيل(المستوى يعنى...ثقافة)
• أنا رايح الحرب (أسم الله عليك عقبال متحرر القدس)
• و كلام تانى كتير زى: الجيلد,الإيليت,الألغام,التاون,الكلاب,سوورد

عارفة ان أى حد هيقولى انتى بتشتكى ليه أكييد انتو اللى علمتوها له .آه أخويا (خاله) هو اللى عرفها له لما كان فاتح سيبر وقفله والحمد لله بس اللعبة اللى علقت معانا بقى فى البيت. عملت لها ديليت أكتر من مرة و أحمد بيتجنن خاصة لما يكون بيلعب عدد من الساعات (مش هقول كام) وفجأة تختفى وكمان هو عرف مكانها وبقى يعرف يسطبها تانى . أساسا وبجد اللعبة مذهلة ومبهرة وعيبها بالمقارنة بأى لعبة تانية انها مش بتخلص يعنى ممكن تواصل معاها أيام. الخلاصة أنا قررت أمنع أحمد من اللعب بس بالتدريج مش فجأة زى كل مرة. هديله 7 أيام عشان تتمسح اللعبة والبرنامج بتاعها من على الكمبيوتر.أنا هقلل معاه شوية شوية و أشغله بحاجات تانية وربنا يعينى. يا ترى سبق وواجهتكم حاجة زى دى. يا ريت لو فى إقتراح عند حد يقولى لأنها بجد مشكلة صعبة و مؤثرة فى حياتنا جدا .

سلام

كرم الله تعالى

عن ابن عباس - رضى الله عنهما-عن النبي - صلى الله عليه وسلم - فيما يروى عن ربه- عز وجل - قال : قال :إن الله كتب الحسنات والسيئات ,ثم بين ذلك, فمن هم بحسنة فلم يعملها كتبها الله له حسنة كاملة ,فإن هو هم بها فعملها, كتبها الله له عنده عشر حسنات ,إلى سبعمائة ضعف ,إلى أضعاف كثيرة .و من هم بسيئة فلم يعملها ,كتبها الله له عنده حسنة كاملة , فإن هو هم بها فعملها ,كتبها الله سيئة واحدة .

صدق رسول الله فيما رواه عن رب العزة. أخرجه البخاري. من كتاب الأحاديث القدسية الجزء الأول ,صفحة 53 .

الله ما أوسع رحمة ربنا وكرمه ؟ مين بقى اللي يحب يحرم نفسه من الفضل ده , ويسيب السيئات تغلب الحسنات مع إن السيئة فردية والحسنات مضاعفة .

ربنا لا تؤاخذنا ان نسينا أو أخطأنا ربنا ولا تحمل علينا إصرا كما حملته على اللذين من قبلنا ربنا و لا تحملنا مالا طاقة لنا به و اعف عنا و اغفر لنا و ارحمنا أنت مولانا فانصرنا على القوم الكافرين ّّ أمينٌ

نسيت المدونة تماما

السلام عليكم ورحمة الله و بركاته

نسييييييييييييت تماما اننى قد بدأت مدونة وأثناء تجولى على الانترنت وجدتها.كم انا محرجة من نفسى لما حدث ولكن هذا يثبت رأيى فى نفسى بأننى لا أبدأ شىء وأكمله.فليكن هذا أحد أهدافى فى هده المدونة(كلما بدأت شى فيجب أن أنهيه). أنا أكره كثيرا أن أجد مدونة قد نسيها صاحبها أياما أو أسابيع أوشهور (أحمر خجلا من نفسى) فأنا أشعر انها كطفل منسى فى مكان ممتلىء بالناس والجميع يمروا به ولا يجدوا له حل سوى التعجب من الأهل و إهمالهم له.حسنا كفانى تعذيب فى نفسى فقد عرفت خطئى ولن يتكرر (أتمنى)ولنبدأصفحة جديدة.إن شاء الله سأبدأ غدا فى التعريف عن نفسى.

وأترككم الان فى رعاية الله.