الجمعة، 24 أبريل 2009

آه ....من كونكر


السلام عليكم ورحمة الله
يا ترى تعرفوا لعبة كونكر Conquer ؟ أنا للأسف أعرفها, بس مش أنا اللى بلعبها, أحمد ابنى هو اللى بيلعبها .أحمد عمره 5سنين ومدمن اللعبة دى . بجد مدمنها وعنده كل علامات الإدمان أو الهوس:
  • بيفكر فيها طول اليوم .
  • بينام يحلم بيها .
  • يعرف كل حاجة عنها .
  • ممكن يحصل له حالة بكاء مفاجأة إذا فصل النت وهو بيلعب .
أنا بسمع من أحمد تعبيرات وكلام عجيب ممكن يقول:
  • انا عاوز أجيب 5 مواتير لسة (أكتر جملة بسمعها)
  • البت بتاعتى ماتت (متفهموش غلط دى واحدة من الشخصيات اللى بيلعب بيها)
  • خلاص يا ماما هقوم بس لما أكمل الليفيل(المستوى يعنى...ثقافة)
  • أنا رايح الحرب (أسم الله عليك عقبال متحرر القدس)
  • و كلام تانى كتير زى: الجيلد,الإيليت,الألغام,التاون,الكلاب,سوورد
عارفة ان أى حد هيقولى انتى بتشتكى ليه أكييد انتو اللى علمتوها له .آه أخويا (خاله) هو اللى عرفها له لما كان فاتح سيبر وقفله والحمد لله بس اللعبة اللى علقت معانا بقى فى البيت. عملت لها ديليت أكتر من مرة و أحمد بيتجنن خاصة لما يكون بيلعب عدد من الساعات (مش هقول كام) وفجأة تختفى وكمان هو عرف مكانها وبقى يعرف يسطبها تانى . أساسا وبجد اللعبة مذهلة ومبهرة وعيبها بالمقارنة بأى لعبة تانية انها مش بتخلص يعنى ممكن تواصل معاها أيام. الخلاصة أنا قررت أمنع أحمد من اللعب بس بالتدريج مش فجأة زى كل مرة. هديله 7 أيام عشان تتمسح اللعبة والبرنامج بتاعها من على الكمبيوتر.أنا هقلل معاه شوية شوية و أشغله بحاجات تانية وربنا يعينى. يا ترى سبق وواجهتكم حاجة زى دى. يا ريت لو فى إقتراح عند حد يقولى لأنها بجد مشكلة صعبة و مؤثرة فى حياتنا جدا .
سلام

هناك 6 تعليقات:

نكهة مغربية يقول...

ربنا يفرحك بنور و أحمد و تشوفيهم زي متحبي

شكرا حبيبتي مدونة رائعة فمتنسهاش تاني

د/عرفه يقول...

بجد فعلا انا اعرف ناس كتير بالشكل ده
حتى عندى واحد صاحبى جاله بواسير من كتر القعدة على كونكر
ههههههههههههه
اظن ممكن تسمحيله بيوم واحد لعب وبعدد معين من الساعات
وفعلا اشغليه بشىء تانى
بس مش لازم تمسحى اللعبة من الجهاز يعنى
ممكن تسمحيله يستمتع بلعبته شوية
بس بوقت معين ويوم معين

إيمان يقول...

بصى يا ستى

أولا متحسيسيهوش انك رافضه للعبه خالص
مالص
بالعكس شاركيه فيها وممكن تلعبى معاه شويه

وبعدين امسحيها من وراه واعملى لوك للنت واستعبطى واعملى نفسك بريئه ومش عارفه حاجه وبالمره اعملى نفسك زعلانه علشان اللعبه مش موجوده
هيزعل شويه ويخبط فى نفسه شويه روحى ممثلاها معاه على الواقع وبعدين ادخلوا على لعبه تانيه يجرى وتجرى وراه مثلا تستخبوا من بعض مثلا وبعدين نزلى فيلم أو اتنين يكونوا ليهم معنى وجذابين بالنسبه ليه علشان يتشغل بيهم شويه وكمان ممكن تخليه يلعب اللعبه بالرسم يعنى يرسمها ويقص الشخصيات ويخليهم يلعبوا مع بعض
وصدقينى يومين تلاته اربعه او اسبوع بالكتير وهيتخلص من الادمان
لكن مترجعيش النت تانى لأنه هيدور عليها تانى
ادخلى على النت وهو مش موجود أو نايم
ومتحوليش تشيلى الموضوع بالتدريج لأنه مش هينفع
وكمان متخليهوش يعرف انك رافضه للعبه او انهك ورا العمله السوده دى
طبعا أنا بنقلك خلاصة تجربه قاسيه عشتها مع لعبة سبيدر مان فضلت سنه أحاول كل المحاولات لحد موصلت لهذه النتيجه
نسيت أقولك حاجه لو حصل وقفشك وانتى على النت وقالك انا عايز اللعبه سيبيه براحته وبعدين اعملى اللى عملتيه قبل كده عااااااااادى جدا
كان معكم إيمان أم لطفل كان مدمن للعبة سبيدر مان
دلوقتى بقى مدمن للعبه تانيه هههههههههه

دعاء عبد الفتاح يقول...

نكهة مغربية
شكرا لك على الزيارة الطيبة وربنا يكرمك .

د عرفة
شكرا على النصيحة , و ربنا يستر الحكاية مش ناقصة البواسير دى كمان.و ربنا يهديه وأشوفه زيك ,قول آمين.

دعاء عبد الفتاح يقول...

إيمان
الله يخليكى على النصيح المجربة, وربنا يهديلنا أولادنا ويبعد عنهم الألعاب اللى بتاكل دماغهم.
شكرا للمرور.

دعاء عبد الفتاح

مامة مازن يقول...

شوفى اختى هو عمره مهيبطل لعب على الانترنت
لكن حاولى تنظمى الموضوع وتوضحيله انك خايفة عليه علشان عينيه الحلوين ما يتعبوش او ان دماغه تتعبه
وعلى فكره انا مريت بالحكاية دى مع بنتى واللى حصل انى استبدلت اهتمامها باللعبة لاهتمامها بحاجة تانية
يعنى مثلا الرسم والتلوين واللعب بالصلصال وكمان القص واللذق فرحيتهم وعنيهم وهى بتضحك مفيش زيها ابدا