الأحد، 26 أبريل 2009

الفريزر صديقى


السلام عليكم ورحمة الله
انا عارفة ان كتير من الأمهات محتاجين لأى مساعدة ممكنة فى المطبخ و أنا عندى طريقة بتسهل عليا شوية حياتى وهى الفريزر . أول حاجة لازم تعرفوها ان الاكل لو اتجمد صح طعمه مش هيتغير أو نقول ( أصله أكل مجمد ) وكل حاجة ليها طريقتها فى التجميد. بالنسبة ليا أول حاجة بتسهل لى وقتى فى المطبخ هى الفريزر كمان بتوفر لى فى فلوسى و مجهودى وتعالو نحسبها:
  1. لو جايين متأخر من برة وتعبانة أو مفيش مزاج تطبخى أول حاجة هتفكرى فيها انك تجيبى أكل جاهز وطبعا ده بيكلفك .
  2. الساعة اللى هتقفى تطبخى فيها أكلة واحدة تطبخى أكلتين تقريبا فى نفس الوقت وبنفس المجهود .
  3. لو انتى تعبانة لا قدر الله أو مش موجودة فى يوم ممكن جوزك أو لو عندك أولاد كبار شوية يسخنو الأكل وياكلو.
  4. كمان لو جايلك ضيوف وعاوزة تبهريهم بأكلك بس ممكن تحتاجى يومين عشان تخلصى الأصناف اللى هتعمليها , ممكن تعملى حاجة أو اتنين وتجمديهم حتى لو قبلها بأسبوع.
  5. مش هنرمى أى حاجة أبدا.
بالنسبة للناس اللى خايفة تجرب هقولكم على حاجات ممكن تبدأو بيها زى: اللحمة المفرومة: تجيبى كمية أكبر شوية من استعمالك العادى يعنى ممكن 2 أو 3 كيلو وتعصجيهم عادى بالبصل والملح والفلفل والبهارات وتسيبيهم يبردو وبعدين تقسميهم فى أكياس على قد كل طبخة وتجمديهم , ولما تحتاجى هتخرجى الكيس قبلها بيوم من الفريزر وتحطيه على الرف فى التلاجة والصبح تستعمليه عادى. الشوربة أو المرقة: لما بنطبخ اللحمة او الفراخ أحيانا بيفيض مننا شوربة ومحدش بيرضى يشربها تانى يوم , مهما كانت الكمية صغيرة حطيها فى كيس وجمديها بس متنسيش تكتبى عليها هى شوربة لحمة وللا فراخ ويا ريت كمان التاريخ ولما تتجمع عنك الكمية المناسبه استخدميا مع أى أكلة , رز , خضار , شوربات ,محشى , بشاميل وهكذا. الكيك والمافن: أنا بحب الخبز يعنى أعمل كيك كتير و مافن وكب كيك وحاجات من دى وطبعا طول ما هى قدامى فى المطبخ أو فى الثلاجة مش ببطل أكل وأنا رايحة و و أنا جاية وطبعا افضل أتخن, فأحسن حاجة انها أول ما تبرد من الفرن الكيك يتقطع ويتجمد فى كيس كبيرأو ألف كل قطعة فى بلاستيك أو فويل وبعدين فى الكيس الكبير.سهلة جدا مع المافن والكب كيك لأنهم أساسا مخبوزين واحدات فى ورق المافن ف بحطهم علطول فى كيس. الموز: أول ما يبدأ لونه يسود وأولادى استحالة ياكلوه طبعا بحطهم فى كيس وأرميهم.....فى الفريزر طبعا مش قلنا مش هنرمى حاجة. أستعملهم بقى فى العصير باللبن أو فى المافن أو لو انتى رايقة بقى زيي ممكن تقطعيه حلقات وترصيهم فى صينية ( اتأكدى الأول ان باب الفريزر هينفع يتقفل ) وتحطيها فى الفريزر ساعة وبعدها تشيليهم من الصينية فى كيس وتسيبيهم فى الفريزر وتستعمليهم للولاد فى الصيف فى العصير بدل مكعبات الثلج. نصيحتى بقى لما تجمدى الموز سليم بيتغير لونه ويبقى أسود بس متخافيش ده طبيع والموز بيفضل زى ما هو مش بيحصل له حاجة بس الأحسن متخرجيهوش قدام جوزك أو أولادك عشان يرضو يشربو العصير هههههههههه. الفراولة: بتغسليها وتصفيها كويس وتشيلى الجزء الأخضر وترصيها فى الصينية بنفس طريقة الموز وتجمديها ودى أحسن طريقة لتجميد الفراولة من غير ما تمسك فى بعضها وبتستعمليها برده فى العصير أو زى ما تحبيها. آخر حاجة البسلة: تقشريها وتغسليها وتنزليها فى مايه بتغلى 3 دقايق وتخرجيها وتصفيها وتشطفيها بمايه باردة ولما تتصفى كويس تجمديها بنفس طريقة الفراولة .أحلى حاجة انك ممكن تحطى كمية كبيرة فى كيس وتستعملى منه حسب الطلب وتقفليه تانى لأنها عمرها ما هتمسك فى بعض.  
 

ملحوظة: الصور المستخدمة للتوضيح بحثت عنها فى Google لكن باقى الموضوع خبرات شخصية.

هناك 7 تعليقات:

Unknown يقول...

أنت كدة بتجمدي كل حاجة انا خايف تكوني بتعطك جوزك في الثلاجة علشان لما تحتاجيه في يوم من الأيام
هههههههههههههه

مامة مازن يقول...

ههههههههههههههههههههه
دعاء يا اختى فى الشقى دا احنا جدعان اهو ومدبرين
شوفى كانك عايشه معايا بس بصراحة ما عدا الموز والكيك وهجرب ما انا اصلى مجربة كبيرة وشوفى بدخل بقلب جامد على الوصفة وتطلع تمام وادينا بنتعلم
بس شكلك جدعةوشاطرة ربنا يخلى اولادك ويسعدك

ELMASRYA - SHAMLOOLA HANEM يقول...

ماشاء الله لا قوة إلا بالله برافو عليكي والله

عجبني جدا موضوع الفراولة والموز

بس الفراولة أكتر

حكاية التجميد في الفريزر قبل وضع الحاجه في الكيس أول مرة أسمع عنها

شكرا ليكي يا دعاء ومنتظرة المزيد والمفيد

أنا ضفت مدونتك عندي وهتابعك بإذن الله

خالص تحياتي

أدهم يقول...

هذه زوجتي زوجتي (الشطورة) بارك الله فيها ويا(أحمد ) لا تخف عليّ من التجميد لأن الحمد لله الحمد لله (الفريزر ) بتاعنا صغير عليا

دعاء يقول...

ماهو عشان كده يا حبيبى اخترعوا الأكياس والسكاكين.

مامة مازن يقول...

ربنا يديم عليكم نعمة الحب ويخليكم لبعض وما يجعل بينكم ابدا لا سكاكين واكياس
دمتم بسلام

نكهة مغربية يقول...

اهد كلوووو
و الله دي من بين احب الموضيع لقلبي علشان بتخليكي ديما مستعد للايام الصعبة

شكرا حبيبتي
موضوع تحفة

تفاصيل من حياتي كل يوم بيومه