الرحمة

النهردة فى حاجتين عاوزة اتكلم عنهم عشان لفتو نظرى و أثاروا فيا تساؤلات الحاجة الاولى : امبارح وانا راكبه الميكروباص وراجعة من شغلى كانت الساعة تقريبا 3.5 أو4 شفت خير اللهم اجعله خير حصان ماشى بيجر عربية محملة انابيب غاز ..مليانة و أكيد معظمنا شال أمبوبة غاز قبل كدة او ركبها قبل ما نتطور ويدخل الغاز الطبيعى بيوتنا. المهم صعب عليا وهو مش قادر يشدها واحنا كنا فى عز الحر والعربية عليها الانابيب 3 أدوار فوق بعض.وأكييد عشان أنا قلبى حنين ومتخيلة انى عايشة فى عالم مثالي فكرت بينى وبين نفسى انه يعنى خلاص مفيش رحمة وهو يعني لو يشيل اقل ولما يببيعهم يرجع ويملى العربية تانى مش هيبقى اسهل ليه وللحصان.وبعدين هي الحكومة فين ومفيش رقابة ليه وهو مفيش حد أقصى للحمولة زى عربيات النقل. الحاجة التانية : النهردة الصبح برده وأنا نازلة الشغل شفت راجل عجوز شغال عامل نظافة (لا مؤاخذة يعنى بيلم الزبالة بتاعة الشعب من الشوارع) ولما بقول راجل عجوز قصدى انه اكتر من 60 سنة ولابس الزى الرسمى لعمال النظافة يعنى عشان محدش يفكر انه شحات أو من الناس اللى بتبقى فى الشارع. تقولولى طيب وايه اللي مدايقك فى دى بقى , مش الحكومة وفرت له شغل أقول وهي الحكومة دى كان هيجيلها كُساح لو فضل فى بيته معزز مكرم و وفرت له معاش .بلاش دي.. أولاده فين لما يكون فى السن ده ونازل يشتغل ويتبهدل ويسمع له كلمة من اللي يسوى واللي ميسواش. ساعتها بقى قولت هو حصان ايه اللي انا زعلت عليه إذا كان البني آدمين بيحصل معاهم كده وهو خلاص معتش في رحمة لا مع ده ولا مع ده. وبعدين افتكرت إن احنا فى مصر

عزاء واجب

إنا لله وإنا أليه راجعون "يا ايتها النفس المطمئنة ارجعي إلى ربك راضية مرضية فادخلي فى عبادي و ادخلى جنتي" البقاء لله وحده اللهم ارحمه اللهم صبر أهله اللهم ارحم موتانى وموتى المسلمين اللهم لا تجعل مصيبتنا في اولادنا وأحبائنا آمين

الكذاب بيروح النار

عفوا.. مهما كانت أسبابك مش هسمح لك انك تكذب عليا و مهما كنت غالى عندى مش هسمح لك تكذب عليا ومهما كنت بحترمك ..كذبك ينزلك من نظرى أصل ايه.. بتتذاكى عليا مفكر انك ممكن تكذب ومعرفش أو أنك حتى ممكن تخبى ومعرفش مانا كده كده هعرف و هايبقى شكلك وحش أنا أكتر شىء مزعلنى انك تفكر فيا انى غبية أو انك ممكن تعدى بيها من غير ما أحس .................... أنتى يا صاحبتى ..مش هقول صديقتى لأنك لسه مبقيتيش و بكذبك عمرك ماهاتكوني أصل انك تفكرى و تألفى قصة حب طويلة وعريضة مليانة عذاب وغرام ومفاجآت وصدف عجيبة أقوم أنا بحسن نيتى ولأنى مش عاوزة أظلمك أقول ..ممكن..احتمال..هه بتحصل..شىء وارد لغاية متعدى حدود الكذب و توصلى للغباء طب يا ستى اكذبى على قدك وبرده ما تفترضيش فيا الغباء إيييييييييييييييييييييه إيه عالم الكذب اللى احنا عايشينه ده وللا هم الناس كلهم بقوا كدة و أنا مش واخدة بالي ............................ أنا الحمد لله عمرى ما كذبت...لأ كذبت بس فى مواقف نادرة لما أحس ان كذبى ممكن ينجى انسان من موقف صعب أو ان كذبى هيصلح بين زوجين متخانقين بس كل كذبى مش بيضر حد ولا بيجرح حد مش عشان أتسلى وللا بقصد الخداع .......................... دوسوا دوسوا وماله ماهو أنا اللي استاهل في إيه يا ناس هى الثقة بقت رخيصة عندكم قوى كدة ممكن تبيعوها فى لحظة كدة لا والله دى مش رخيصة أبدا دى غالية قوى حاولوا كدة ترجعوها تانى ..هتدفعوا دم قلبكم وبرده مش هترجع.

قهوة الصباح

يا سلام لما أصحى الصبح كدة و دماغي مشغولة بمليون حاجة وحاسة انى مش هعرف اعمل ولا حاجة

وادخل المطبخ وأعمل مج القهوة اللي هو واروح قاعدة على الكمبيوتر و أفتح الميل بتاعي والف لفة على البلوجر و أشوفGoogle Reader وكل ده وانا بشرب ايييييييييييييييييييييييه صح .. القهوة اللي هى ممكن تكون سادة أو باللبن أو قهوة فورية المهم تكون قهوة من نوعية كويسة ومظبطة. قوم ايه: أحس بقى ان دماغى نورت كده وعقلي بدأ يستوعب اللي هعمله النهردة و الحياه بقى لونها بمبي..بمبي..بمبي أحم نرجع لموضوعنا أكتشفوا ( العلماء يعني) ان القهوة بتقلل نسبة الاصابة بالزهايمر -اللهم احفظنا-كمان قالو انها بتقلل من تأثير الكوليسترول الضار اللي فى الدم واللى هو كمان سبب للزهايمر - اللهم أحفظنا كمان مرة. كمان اكتشفوا ان الكافيين اللى فى القهوة بيوصل تأثيره في خلال دقايق للادرينالين اللى بينشط هرمونات بتوصل بشكل مباشر للجهاز العصبي وتنشطه اللي بيسبب صفاء الذهن و قوة التركيز و سرعة البديهة وممكن كمان تأخر الاحساس بالتعب. كمان القهوة فيها مضادات للأكسدة اللي بتقلل من فرصة الاصابة بأمراض القلب والسرطان ومرض السكري. لكن القهوة أو الكافيين بالخصوص مادة يمكن ادمانها ولو كترت منها يعني أكتر من 3 أو 4 أكواب بتسبب التعب و الاجهاد و الصداع و الدوخة و الدوار و .. الاسهال و ساعتها الحياه مش هتبقى بمبي ولا حاجة وهتشوف كل حاجة قهوة .. قهوة .. قهوة بس خلاص..

و أحببتك إلى الأبد

في البداية كده وعشان محدش يفكر انى بقيت بكتب شعر ,الكلام ده مش كلامي ده منقول من مجلة زهرة الخليج سنة2000 وعلى ما أذكر الكاتبة كانت اسمها شهرزاد كنت بحب زماااااااااااان أنقل الكلام اللى بيعجبنى عندى زمان قوى أيام لما مكانش فى أولاد بيزنوا على دماغي زي نور كده ماهى بتزن وبتتخانق مع أحمد وأنا بكتب ودماغي هيحصل فيها انفجار ما علينا خلينا في الكلام اللي جاي و اللي أتمنى انه يعجبكم زي ما كان عاجبني زمان ودلوقت لو أنك أخبرتنى.. أن الشمس تشرق لي وحدي و ان القمر يضيء لي وحدي و أن الطيور تغرد لي وحدي لصدقتك..!! و أحببتك إلى الأبد. لو أنك علمتني .. الوفاء بعد الخيانة و الصدق بعد الكذب و الأمان بعد الخوف لوثقت بك..!! وأحببتك إلى الأبد. لو أنك أوهمتني.. أن لون السماء أحمر و لون الأشجار أبيض و لون الثلوج أسود لرأيت الوجود بعينيك..!! و أحببتك إلى الأبد. لو أنك حدثتني.. أنك الصادق الوحيد فوق الأرض و الفارس الوحيد فوق الأرض والعاشق الوحيد فوق الأرض لصدقتك..!! و أحببتك إلى الأبد. لو أنك رحمتنى.. و تسترت عند الغدر و تسترت عند الكذب و مارست الخيانة في الخفاء لأغمضت عيني..!! و أحببتك إلى الأبد. لو أنك خدعتني.. و وعدتني بسفينة نوح وعصا موسى و ناقة صالح لصدقتك..!! و أحببتك إلى الأبد. لو أنك دربتني.. على الطيران بلا أجنحة والحياة بلا ماء و التنفس بلا هواء لتمكنت من الحياة بعدك..!! و أحببتك إلى الأبد. لو أنك صارحتني.. أن الواقع أقسى منك و أن الظروف أقوى منك و أن الحلم الجميل أكبر منك لعزرتك..!! و أحببتك إلى الأبد. لو أنك قاسمتني.. نصف الأحزان و نصف الضياع و نصف البكاء لاحترمتك..!! و أحببتك إلى الأبد. لو أنك غادرتني.. كفرسان الأمس مرفوع الرأس و تحت أضواء الشمس لقدرتك..!! و أحببتك إلى الأبد. لو أنك منحتني.. نصف قلبك ونصف حلمك ونصف عمرك لمنحتك عمري كله..!! و أحببتك إلى الأبد. لو أنك خلفتني.. فوق الأرض الخضراء و تحت السماء الزرقاء وبين الورود الحمراء لشكرتك..!! و أحببتك إلى الأبد. لو أنك عذبتني..رغما عنك و فارقتني..رغما عنك وتنازلت عني ..رغما عنك لبكيتك........ و أحببتك إلى الأبد..إلى الأبد.

فضفضة

صباح الخير..أو مساء الخير ..حسب النهردة انا زهقانة و نفسى مصدودة قولوا بقى ايه الاكتئاب ده على الصبح بس بجد اكيد كلكم عارفين الاحساس ده لما تكون نفسكم مقفوله من كل حاجة ومش عاوزين تعملوا أى حاجة ونفسكم حد ييجى يقولكم ادخلوا ناموا وسيبوا كل اللى فى ايديكم وساعتها تقولى هييييييييييييييييييييييييه بس ساعتها يا ترى هنرتاح وللا زى ما بيقولو الدنيا مافيهاش راحة بقولكوا ايه سيبكم منى ومن تخاريفى التفاؤل حلو برده صح؟ نعتمد على الله وهو قادر على كل شىء انتو بتعملو ايه لما تيجى الحالة دى؟

لو كنت متـخـذا خـلـيـلا

السلام عليكم ورحمة الله و بركاته

قال رسول الله صلى الله عليه وسلم: ( لو كنت متخذا خليلا لاتخذت أبا بكر خليلا )

صدق رسول الله صلى الله عليه وسلم

كانت لي فيما مضى صديقة عرفتها منذ سنوات. لم نكن نفترق تزوجت أنا ثم تزوجت هي بعدي بفترة .فجأة انقطعت بيننا الإتصالات بدون داعى,ربما لإنشغالات الحياه والزواج والأولاد و كلما ذاد الوقت أصبح من الصعب العودة لما كنا عليه. كلما تذكرت كم كنا نضحك معا وكم كنا نبكى معا وكم كانت لنا ذكريات لا تنسى وأيام وأسرار (أحم...) ومصائب. تمر بنا الأيام وننسى ما كان و ما كنا ولكن فى بعض الأوقات تحن القلوب و تتألم لما وصلنا إليه.. قد أكون أنا السبب فى هذا فلم أكن نِعم الصديق لها ,لم أكن بجانبها عندما توفيت والدتها فأنا لم أعرف إلا بعدها بفترة طويلة و تحججت (لنفسي) بأنى تأخرت فى السؤال وأنى لا أعرف ما أقول لها , ومرت الأيام ومرت شهور ولا زلنا فى هذا الإنقطاع شبه المتفق عليه. تسائلت لماذا أعاتب نفسي وهى لم تكن أيضا نِعم صديق و تذكرت أنى غالبا ما كنت أنا المتصلة بها فى كل مرة ولم تكن هى بجانبى فى أصعب الأوقات وكيف لى أن أعرف بوفاة والدتها و أنا أسكن بعيدا عنها وليس بيننا معارف مشتركة. كان من الممكن أن تكلف أى شخص أن يخبرنى حتى لو بعدها بفترة أو تخبرنى هى بعد مرور كل هذا الوقت ... هذ كله دفعنى لأكتب فى هذا الموضوع ..الصديق.. فقد توصلت من خلال قرائتى لبعض الكتب أن الصديق المحب لصديقه له بعض الصفات:

1. يحفظ أسرارك عن جميع الناس و إن لم تطلب .
2. يفرحه ما يفرحك و يحزنه ما يحزنك .
3. خير معين وسند عند الحاجة فيفرج عنه الضيق بماله ونفسه .
4. يدفع عنك الأعداء ويدافع عن حقك ولا يقبل الظلم أو الإفتراء عليك .
5. لا يحسدك ولا يحقد و لا يغار من نعمة أنعم الله بها عليك .
6. يفرح إن أنعم الله عليك بفضله و يدعو لك بدوامها .
7. يظهر محاسنك و يكتم عيوبك و يحفظك فى غيبتك .
8. لا يخذلك وقت الضيق و لا يسلمك للعدو .
9. يصافى من يصافيك و يحبك , و يجافى من يعاديك ويبغضك .
10. صداقته فى العسر و اليسر و الحزن و الفرح .
11. لا يجلب لك المتاعب عن قصد ولا يوقعك فى الفتن و المصائب .
12. تستمر صحبته طوال عمرك ويدعو لك حيا و ميتا .
13. يحرص على زيارتك رؤيتك ومحادثتك .
14. يحبك لله لا لمصلحة أو حاجة .
15. لا يكذب لك أو عليك أبدا و إن كان مازحا .
16. يظهر ما يبطن واضح فى تصرفاته غير منافق .
17. ينصحك أذا أخطأت على انفراد و يرشدك برفق و لين و أدب .
18. يلقى عليك السلام و يصافحك عند اللقاء .

أما الصفات التى ينبغى أن يتحلى بها الصديق فهى :

1. يداوم على الصلاة فى وقتها .
2. ذو صلاح و أدب و حياء .
3. مجتنب للكبائر والمنكرات التى تلحق بصاحبها اللعن و العذاب و الغضب من الله .
4. لديه روح الدعابة و المزاح بحدود الوسط .
5. مظهره حسن بما يوافق الدين دون إفراط أو تفريط .
6. بار بوالديه مطيع لهما .
7. مفتاح للخير مغلاق للشر حريص على مكارم الأخلاق والسنن النبوية .
8. بعيد كل البعد عن الغيبة و النميمة و لغو الكلام ولا يتحدث بكل ما يسمع .

قال رسول الله صلى الله عليه وسلم : (المرء على دين خليله فلينظر أحدكم من يخالل)

صدق رسول الله صلى الله عليه وسلم

فلينظر كل منا حوله ويختار الصديق الذى يوصلنا إما إلى جنات و نعيم أو عذاب وجحيم . وإذا وجدت الصديق فتمسك به و حافظ عليه واجعله دوما قريب إلى قلبك فالأرواح جنود تتآلف عند التوافق . واسأل نفسك : هل كنت لصديقك كما تريده أن يكون لك؟

الهجوم الكبير

البيت دايما محتاج.. شغل ,زوج ,أولاد, طبخ ,غسيل وشغل كمان, و بصراحة أنا مُقصرة فيهم كلهم وبعترف بكدة ( بس متقولوش لأدهم ) بس دايما بحاول أصحى نفسى و أقول نبدأ من النهردة. مش عارفة أساسا ايه السبب فى الحالة دى يا ترى الحالة النفسية وللا الإقتصادية وللا ضغوط الحياه كلها على بعضها ملخبطالنا حياتنا . وساعات بحس ان أنا اللى شايفة كدة وانى مش مقصرة فى أى حاجة وانى بأطلب من نفسى أكتر من الازم و ده كل اللى بقدر عليه. المهم انا وانا بتصفح النت كدة لقيت موضوع ليه علاقة بالكلام ده والحقيقة انه جه فى وقته , هى واحدة عادية وعندها زوج وبيت وأولاد وحبت تعمل نظام تنضيف لبيتها زى تنفيضة العيد عندنا كدة بس هم عندهم تنفيضة الربيع . وبما ان احنا برده عندنا ربيع فقلت أجرب أمشى عليها ونشوف هم أحسن مننا يعنى ... الموقع اسمه simplemom.net للى حابين يشوفوه .النظام عبارة عن 10 أيام فى اسبوعين .. يعنى إيه.. يعنى 5 ايام فى الأسبوع وراحة فى نهاية الأسبوع ونكمل فى الأسبوع اللى بعده بنفس النظام , وهى مقسماهم ازاى :

1. كنس للبيت كله
2. غرفة المعيشة (الجزء الأول)
3. غرفة المعيشة (الجزء الثانى)
4. المطبخ (الجزء الأول)
5. المطبخ (الجزء الثانى)
6. الحمام ( أو الحمامات )
7. غرفة الأولاد (الجزء الأول)
8. غرفة الأولاد (الجزء الثانى)
9. غرفة النوم الرئيسية
10. مدخل البيت الخارجى (بما انى فى شقة ف هنمشيها البلكونات)

أنا بصراحة بدأت معاهم من امبارح بس اللى حابة تمشى معايا ممكن تبدأ فى الوقت اللى يناسبها ونبقى نتابع مع بعض أهو نشجع بعضنا . أخواتى فى الكفاح عدونا واضح.. التراب و الأوساخ و لعب الأولاد اللى مالية البيت والهدوم اللى عاوزة تتطوى , ده غير الهدوم الصيفى اللى عاوزة تطلع من مخبأها وغيره وغيره وكل واحدة عارفة مين الأعداء بتوعها . و أكييد كل واحدة عارفة ايه المكان اللى هيحتاج منها يوم وإيه المكان اللى هيحتاج منها يومين أو أكتر. وأحلى ما فيه انه مناسب للى بتشتغل لأن البيت مش هيتقلب كله فوق دماغك مرة واحده وكمان انه مش هيضيع ايام الأجازة اللى مستنياهم طول الأسبوع ومحضرة 100 حاجة تانية تعمليها . أحب أعرف انتو زيي كدة الدنيا ملخبطة معاكم وللا عارفين تنظموها ولو عارفين قولو بتعملو ايه عشان أستفيد أنا واللى زيي .