الخميس، 21 مايو 2009

الرحمة


النهردة فى حاجتين عاوزة اتكلم عنهم عشان لفتو نظرى و أثاروا فيا تساؤلات الحاجة الاولى : امبارح وانا راكبه الميكروباص وراجعة من شغلى كانت الساعة تقريبا 3.5 أو4 شفت خير اللهم اجعله خير حصان ماشى بيجر عربية محملة انابيب غاز ..مليانة و أكيد معظمنا شال أمبوبة غاز قبل كدة او ركبها قبل ما نتطور ويدخل الغاز الطبيعى بيوتنا. المهم صعب عليا وهو مش قادر يشدها واحنا كنا فى عز الحر والعربية عليها الانابيب 3 أدوار فوق بعض.وأكييد عشان أنا قلبى حنين ومتخيلة انى عايشة فى عالم مثالي فكرت بينى وبين نفسى انه يعنى خلاص مفيش رحمة وهو يعني لو يشيل اقل ولما يببيعهم يرجع ويملى العربية تانى مش هيبقى اسهل ليه وللحصان.وبعدين هي الحكومة فين ومفيش رقابة ليه وهو مفيش حد أقصى للحمولة زى عربيات النقل. الحاجة التانية : النهردة الصبح برده وأنا نازلة الشغل شفت راجل عجوز شغال عامل نظافة (لا مؤاخذة يعنى بيلم الزبالة بتاعة الشعب من الشوارع) ولما بقول راجل عجوز قصدى انه اكتر من 60 سنة ولابس الزى الرسمى لعمال النظافة يعنى عشان محدش يفكر انه شحات أو من الناس اللى بتبقى فى الشارع. تقولولى طيب وايه اللي مدايقك فى دى بقى , مش الحكومة وفرت له شغل أقول وهي الحكومة دى كان هيجيلها كُساح لو فضل فى بيته معزز مكرم و وفرت له معاش .بلاش دي.. أولاده فين لما يكون فى السن ده ونازل يشتغل ويتبهدل ويسمع له كلمة من اللي يسوى واللي ميسواش. ساعتها بقى قولت هو حصان ايه اللي انا زعلت عليه إذا كان البني آدمين بيحصل معاهم كده وهو خلاص معتش في رحمة لا مع ده ولا مع ده. وبعدين افتكرت إن احنا فى مصر

هناك 14 تعليقًا:

عمرو يقول...

صباح الخير ..
يا ستى هو فيه لسه أصلا عربيات كارو بحصنه و حمير بتمشى فى شوارع غير فى مصر ؟؟؟!!
المنظر ده أصلا من أساسه غلط .. و فكرة وجود حصان بيجر عربيه عليها أنابيب بوتجاز وسط الناس فى الشوارع غلط .. و التعامل بقسوه مع الحيوان برضو غلط و حرام ..
الزبال ده بقى و ملايين غيره ليهم رب اٍسمه الكريم سبحانه مقسم الأرزاق .. يعنى حنقول أيه غير كده ؟؟!!
تقبلى تحياتى و تقديرى

ومازلتُ أتعلم يقول...

موضوع مهم جدا بس نقول ايه
مصر لسه فيها ناس اكل عيشهم من العربية الكارو والحمار

و نفس الحال للزبال
تقبلى مرورى

نكهة مغربية يقول...

و الله كلامك مؤتر جدا و للأسف ده اللي موجود في معضم الدول العربية اللي في طور النمو
و الله الحاجات دي لما نشوفها نتألم بس بننسى بسرعة و نرجع لحياتنا و أولادنا عادي و مبنخدش بالنا غير لما بنشوف حاجة مؤلمة زي دي

الله يعفو عنا و يرحمنا في الدنيا و الاخرة اللهم أصلح حالة مجتمعنا و نفوسنا

مامة مازن يقول...

ازيك يا دودى ميرسى قوى يا حبيبتى وشكرا جزيلا ليكى على كلماتك المشجعة فى مدونتى ربنا يبارك لك يارب
شوفى بيصعب على قوى لما اشوف واحد بيضرب الحمار او الحصان وهو بيشد عربية تقيلة ومش قادر يطلع بيها مطلع وتلاقى صاحب الحمار عمال يضربوه بعصايه غليظة ويهبد فى جسمة لدرجة مرة قولت ياعم حرام عليك دا رسول الله قالنا ان فى واحدة دخلت النار علشان حبست قطة قالى وانتى والك يا ابلة هو الحمار كان اشتكالك
الكلام ده من سنين من ساعتها ابص للحمار واقول فى سرى معلش يا حمار استحمل بقى ماهو بيجيبلك البرسيم برضه
وبرضه الراجل الزبال الضعيف ممكن تلاقيه عنده50 بس الضعف الجسمانى من سوء التغذية مديه اكتر بس برضه ابصله واقول فى سرى معلش استحمل اكل العيش مر
وبحس انه جدع لانه ممدش ايده وقال لله لا رضى بالقليل علشان كده ربنا هيكرمه
معلش طولت عليكى

romansy يقول...

احساس جميل قوى اننا نحس بالبشر اللى حوالينا
احساس جميل قوى اننا نحس ان فيه ناس تستاهل الشفقه بس على رايك انتى جبيتى من الاخر ما زلنا فى مصر

أم أحمد المصرية يقول...

دام قلبك الرقيق يا دعاء
عارفة ايه الحاجدة الغريبة انك شفتي موقفني بس اثروا فيك
كم ذا مصر يا بنتي
معلش ان شاء الله بكرة احلي من النهاردة

Unknown يقول...

رحمة كلمة سمعتها لالالالالالالالا قرايت عنها في كتب التاريخ اه كمان مشتقة من اسم ربنا

ما هو خالص باقه مفيش رحمة عندنا الناس اصلا

شمس النهار يقول...

بالنسبه للحصان لما نكون ماعندناش رحمه مع بعض وكل واحد بيقول ياله نفسي يبقا حصان ايه اللي هنفكر فيه
مع ان تعاليم الدين بتقول غير كده
اما بالنسبه للعجوز هو مش موظف والا حاجه عشان 70 يبقا اتحال علي المعاش
لكن دول شحاتين محتارفين

mimi يقول...

صباح الخير .. تقبلي مروري ...

حلو البوست ده جميل .. والأجمل إن عنيكي بتشوف الرحمة ...

موناليزا يقول...

مش عارفة اقول ايه
فمصر من احب البلاد الى قلبى رغم وجود هذه المساوئ

دعاء يقول...

أصدقائى واخوانى واخواتى
أنا فضلت انى معلقش على تعليقاتكم واحد واحد عشان أترك المجال للآراء والأحاسيس وتعبروا عنها براحتكم.لأنى متأكدة ان كل واحد فيكم سبق و مر بموقف من المواقف دي

بس أشكركم جميعا على المرور وعلى الأحاسيس الطيبة

MOHAMMED ELBANNA يقول...

دعاء
كيف الحال ؟
اتمنى تكوني بخير .
بصراحه موضوعك صعب وكلنا بنشوف المناظر دي في كل مكان .
للأسف تاهت الرحمه في وسط تكالب الناس على الدنيا .
ولا حول ولا قوه الا بالله .
تقبلي تحياتي ومروري.
محمـد
طريق النجاح
________________
من لا يرحم لا يرحم .
اللهم ارحم من رحمنا .

مامة مازن يقول...

دعاء ازيك فينك يا اختى العزيزة خير طولتى الغيبة
اه منك انتى اوعى تنسى المدونة تانى حرام عليكى دى مدونة جميلة وبحب كلامك فيها ها اوعى
سلامى لنور واحمد

لاسع افندى يقول...

يبقى انت اكيد فى مصر


تحياتى

تفاصيل من حياتي كل يوم بيومه