الثلاثاء، 5 مايو 2009

الهجوم الكبير

simple-mom-spring-cleaning-party
البيت دايما محتاج.. شغل ,زوج ,أولاد, طبخ ,غسيل وشغل كمان, و بصراحة أنا مُقصرة فيهم كلهم وبعترف بكدة ( بس متقولوش لأدهم ) بس دايما بحاول أصحى نفسى و أقول نبدأ من النهردة. مش عارفة أساسا ايه السبب فى الحالة دى يا ترى الحالة النفسية وللا الإقتصادية وللا ضغوط الحياه كلها على بعضها ملخبطالنا حياتنا . وساعات بحس ان أنا اللى شايفة كدة وانى مش مقصرة فى أى حاجة وانى بأطلب من نفسى أكتر من الازم و ده كل اللى بقدر عليه. المهم انا وانا بتصفح النت كدة لقيت موضوع ليه علاقة بالكلام ده والحقيقة انه جه فى وقته , هى واحدة عادية وعندها زوج وبيت وأولاد وحبت تعمل نظام تنضيف لبيتها زى تنفيضة العيد عندنا كدة بس هم عندهم تنفيضة الربيع . وبما ان احنا برده عندنا ربيع فقلت أجرب أمشى عليها ونشوف هم أحسن مننا يعنى ... الموقع اسمه simplemom.net للى حابين يشوفوه .النظام عبارة عن 10 أيام فى اسبوعين .. يعنى إيه.. يعنى 5 ايام فى الأسبوع وراحة فى نهاية الأسبوع ونكمل فى الأسبوع اللى بعده بنفس النظام , وهى مقسماهم ازاى :
  1. كنس للبيت كله
  2. غرفة المعيشة (الجزء الأول)
  3. غرفة المعيشة (الجزء الثانى)
  4. المطبخ (الجزء الأول)
  5. المطبخ (الجزء الثانى)
  6. الحمام ( أو الحمامات )
  7. غرفة الأولاد (الجزء الأول)
  8. غرفة الأولاد (الجزء الثانى)
  9. غرفة النوم الرئيسية
  10. مدخل البيت الخارجى (بما انى فى شقة ف هنمشيها البلكونات)
أنا بصراحة بدأت معاهم من امبارح بس اللى حابة تمشى معايا ممكن تبدأ فى الوقت اللى يناسبها ونبقى نتابع مع بعض أهو نشجع بعضنا . أخواتى فى الكفاح عدونا واضح.. التراب و الأوساخ و لعب الأولاد اللى مالية البيت والهدوم اللى عاوزة تتطوى , ده غير الهدوم الصيفى اللى عاوزة تطلع من مخبأها وغيره وغيره وكل واحدة عارفة مين الأعداء بتوعها . و أكييد كل واحدة عارفة ايه المكان اللى هيحتاج منها يوم وإيه المكان اللى هيحتاج منها يومين أو أكتر. وأحلى ما فيه انه مناسب للى بتشتغل لأن البيت مش هيتقلب كله فوق دماغك مرة واحده وكمان انه مش هيضيع ايام الأجازة اللى مستنياهم طول الأسبوع ومحضرة 100 حاجة تانية تعمليها . أحب أعرف انتو زيي كدة الدنيا ملخبطة معاكم وللا عارفين تنظموها ولو عارفين قولو بتعملو ايه عشان أستفيد أنا واللى زيي .

هناك 5 تعليقات:

عاشقه وغلبانه يقول...

انا بنضف البيت كله في يوم واتعبلي بعدها اسبوع
هههههههههههههههههههههههه

لسه هانقسمه..!
وبعدين تعب ساعه ولا كل ساعه

ربنا يقويكي يارب
خلي بالك من لعب الاولاد

دعاء يقول...

عاشقة وغلبانه

شكرا لزيارتك

انا فعلا لما أعمل البيت كله بنام اسبوع
بس زى ما قلت انه مناسب ليا عشان بقيت بشتغل
دعاء

أم أحمد المصرية يقول...

صديقتي الجديدةدعاء
اول مرة ازورك حسيت اني بجد داخل بيت مصري ربنا يقويك و يقويني انا بس لي اقتراح لو اولادك كبار شوية ممكن يساعدوك ولو في تجميع اللعب ووضع اشياؤهم في مكانها و يكون ده شرط قبل البدء في متعة لهم يعني رتب اللعب عشان تتفرج علي الكارتون اللي بتحبه مثلا
انا بحاول اعمل كده مع الاولاد ولو ان الاعمار عندي تسمح بما هو اكثر مثلا اغسل الكوب اللي شربت فيه- املأ زجاجة الماء - علق ملابسك - الاشياء البسيطة دي بتفرق معي و انا بنظف البيت لأنها بتقلل وقت الترويق
و بما اني بشتغل انا دائما بجهز الاكل مساء عشان لا يحدث تأخير في موعد الغذاء و دائما عندي خضار في الديب فريزر للطوارئ

اعتراف أخير :
فيه واحدة بتيجي تساعدني في التنفيضات الكبيرة و اعتقد ان ده ضروري لأي واحدة بتعمل و لن يكون مكلف لأنك بتدفعي بالمرة و تحضريها وقت ما تتزنقي فقط

مع خالص تمنياتي بيت زي الفل و ان شاء الله تواصل دائم

مامة مازن يقول...

اختى دعاء يا عسل انتى اولا شكرا على زيارتك مدونتى
ثانيا فعلا الموقع ممتاز وان شاء الله هحطه فى البوك مارك علشان اتابعه شكرا
ثالثا يا ستى مشكلتى مش كبيرة قوى يعنى لانى لا اعمل
واولادى اكبر من اولادك شوية علشان كده هما مسئولين عن لعبهم مسئولية تامة واى حاجة مقدور عليها ان شاء الله
مشكلتى دائما مع المطبخ والحمام لان ماء الصنبور بيخلى السيراميك يصفر اصل الميه هنا فظيعة لازم فلتر وكل يومين تلاته لازم يتغسل والا المنظر بيبقى نيلة خالص
لكن معاكى فى الحملة وهبتدى بيهم طبعا كالعادة
شكرا وتمنياتى بحملة قوية ونتائجها ميه ميه

دعاء يقول...

أم أحمد
نورتينى
أنا أولادى سنهم أقل من 6 سنين بس إن شاء الله ناويه أطلع عينهم شغل لما يكبرو شوية
هههههههههه
بجد شرفتى مدونتى


مامة مازن
ربنا يبارك لك فى أولادك وتفرحى بيهم
بالنسبة للإصفرار أنا بسمع ان الخل و بيكربونات بينضفوهم بسرعة أنا شخصيا جربتهم فحاولى و إن شاء الله تلاقى نتيجة

تفاصيل من حياتي كل يوم بيومه