الأحد، 17 مايو 2009

قهوة الصباح

يا سلام لما أصحى الصبح كدة و دماغي مشغولة بمليون حاجة وحاسة انى مش هعرف اعمل ولا حاجة
وادخل المطبخ وأعمل مج القهوة اللي هو واروح قاعدة على الكمبيوتر و أفتح الميل بتاعي والف لفة على البلوجر و أشوفGoogle Reader وكل ده وانا بشرب ايييييييييييييييييييييييه صح .. القهوة اللي هى ممكن تكون سادة أو باللبن أو قهوة فورية المهم تكون قهوة من نوعية كويسة ومظبطة. قوم ايه: أحس بقى ان دماغى نورت كده وعقلي بدأ يستوعب اللي هعمله النهردة و الحياه بقى لونها بمبي..بمبي..بمبي أحم نرجع لموضوعنا أكتشفوا ( العلماء يعني) ان القهوة بتقلل نسبة الاصابة بالزهايمر -اللهم احفظنا-كمان قالو انها بتقلل من تأثير الكوليسترول الضار اللي فى الدم واللى هو كمان سبب للزهايمر - اللهم أحفظنا كمان مرة. كمان اكتشفوا ان الكافيين اللى فى القهوة بيوصل تأثيره في خلال دقايق للادرينالين اللى بينشط هرمونات بتوصل بشكل مباشر للجهاز العصبي وتنشطه اللي بيسبب صفاء الذهن و قوة التركيز و سرعة البديهة وممكن كمان تأخر الاحساس بالتعب. كمان القهوة فيها مضادات للأكسدة اللي بتقلل من فرصة الاصابة بأمراض القلب والسرطان ومرض السكري. لكن القهوة أو الكافيين بالخصوص مادة يمكن ادمانها ولو كترت منها يعني أكتر من 3 أو 4 أكواب بتسبب التعب و الاجهاد و الصداع و الدوخة و الدوار و .. الاسهال و ساعتها الحياه مش هتبقى بمبي ولا حاجة وهتشوف كل حاجة قهوة .. قهوة .. قهوة بس خلاص..

هناك 28 تعليقًا:

MOHAMMED ELBANNA يقول...

اشكرك دعـاء على هذا الموضوع .
فهناك كثيراً من الاشخاص الذين يدمنون بالفعل شرب القهوة مما تؤثر بالسلب على صحتهم وعلى جهازهم العصبي .
انا عموماً لا احب شرب القهوة لأن ضرها اكبر من نفعها .
محمـد
طريق النجاح
ــــــــــ
اتمنى تشرفيني بالزياره على مدونتي (طريق النجاح)
http://tareekelnagah.blogspot.com/

ELMASRYA - SHAMLOOLA HANEM يقول...

أنا بقى ماليش في القهوة ولا النسكافيه ومش عارفه ليه بيحصل ليا حاجات غريبه لو شربت منهم

دقات القلب بتتسرع جامد قوي وبحس إن روحي بتروح

ياريت يا دودو لو عندك تفسير تقوليلي لأني مش فاهمه اللغز ده

آخر صورة حاطاها جميلة قوي ومبتكرة

تمنياتي ليكي كل صباح إن الحياة تبقى بمبي بمبي بمبي

موااااااااااه

دعاء يقول...

MOHAMMED ELBANNA
شكرا لمرورك يا أخ محمد
بالنسبة ليا انا بجد بحب القهوة حتى من صغرى وقبل كمان ما أتجوز بس الناس ازواق وعامة القليل منها مفيدلكن الكثير هو اللى مضر
إن شاء الله هزورك في مدونتك
شكرا لمرورك

دعاء يقول...

SHAMLOOLA HANEM
زي ما أنا قلت ان الاكثار من القهوة هو اللى بيسبب الاعراض دي بس فى ناس مش بتتحمل وبتظهر عليها من أول فنجان أو كوب بيشربوه .
عامة من الافضل بالنسبه ليكى تشربيها خفيفة وكمان تشربيها بس لما تكونى داخلة على شغل جامد ومحتاجة للطاقة الزيادة.
و ميرسي جدا على زوقك الحلو

مامة مازن يقول...

دعاء ازيك موضوع جميل والصورة الاخيرة حلم كل محبى القهوة
لما بشترى بن باستاذن صاحب المحل فى حبيتين هو صحيح مبتبقاش حلوة قوى بس اهو
المهم القهوة من مكونات مطبخى الاساسية علشان زوجى بيحبها قوى وانا كمان بس مبقتش صراحة اشربها الا يوم الجمعة بس علشان بيبقى طعمها احلى معاه
حتى الكابتشينو والحاجات التحفة بنت اللذيذة دى
شوفى اكبر كوب شاى بالنسبة لى حل للخبطة دماغى يعنى بينفع معايا
شكرا للمعلومات القيمة ودمتى بكل خير

د/عرفه يقول...

أكيد القهوة لها فوايد كتيرة
بس اى شىء يزيد عن حده بيتقلب لضده
زى ما انتى وضحتى

اه
بس حاسبى ومتشربيش القهوة على معدة فاضية
ياريت تفطرى الاول
هههههههه
علشان تحافظى على معدتك بس

وشكلك من اصحاب المزاج زيى
هههههههههههه
سلام

دعاء يقول...

مامة مازن
يا رب يديم المحبة بينكم و يجمعكم دايما على خيرانتو وأولادكم.
فعلا القهوة بيبقى ليها طعم تانى مع اللى بنحبهم..هى اساسا كل حاجة بيبقى ليها طعم تاني معاهم..صح

دعاء يقول...

د/عرفه
والله فعلا بشربها على معدة فاضية بس بفطر بعدها بحوالي نص ساعة.
فعلا أصحاب الكيف ..قصدى المزاج بيفهموا بعض
هههههههه

نكهة مغربية يقول...

صح يا دعاء الكافيين له فوائد و أضرار
ربميا يحفضنا من شرها و ينفعنا ب فوائدها
شكرا يا دعاء و ربنا يخليك

دمتي في رعاية الله و حفضه

إيمان يقول...

الله حلو شكل فنجان القهوه اللى فى الصوره
خلانى قومت عملت قهوه
حلوه المعلومات وكويس انا مبشربش اكتر ن فنجال واحد فى اليوم

موناليزا يقول...

يعنى اول حاجة خالص فى يومك قهوة والانترنت كمان:)
بس انا اسمع ان شرب القهوة مباشرة بعد الاستيقاظ مش صحى

وليد يقول...

موضوع قيم فعلا ربنا يكرمك ويجزيكى كل الخير افدتينا ولو تكرمتى ممكن تقبلينى صديق للمدونة دمتى فى حفظ الرحمن

ســـهــــر يقول...

دودو تعرفى انا يومى بيبدء بفنجان قهوة بن غامق مظبوطة ههههههههههههه
ومعاهم اسمع فيرزو
بس اهو لية شوية فوائد اهه
مع حبة اضرار صغنططة

ميرسى ليكى ع البوست يا قمرة

دعاء يقول...

نكهة مغربيه
شكرا ليكى ودمتى لى صديقة

...................

إيمان
انتى كدة ماشية صح ..
شوفتى القهوة معدية ازاى
شكرا للمرور

دعاء يقول...

موناليزا
انا لازم ابدأ كدة وبعدين أدخل على التقيل ..الشغل والولاد والبيت وهكذا..امال نمشيها ازاى

..............

وليد الاسلام
الله يخليك يا رب ده انت نورتنى بزيارتك للمدونة و مرحبا بك صديقا للمدونة ان شاء الله

دعاء يقول...

سهر
فعلا كملتيها انتى كدة بفيروز وأنا قاعدة اقول ايه اللى ناقص ,ايه اللى ناقص انتى كده حليتيها
ميرسي جدا لزيارتك
و ما تتأخريش علينا

ملكة في بيتي يقول...

معاكي بالنسبة للنسكافيه لكن القهوة العادية لااااااا

بس احب اقعد جنب حد بيشرب قهوة علشان بموت في ريحة البن المحوج :)

دعاء يقول...

ملكة في بيتي
أنا بقى بحب امشى فى الشارع اللي فيه محمصة ومطحنة البن
بجد البن وهو مطحون طازة بتبقى ريحته رائعة

ميرسى ليكى

شمس النهار يقول...

صباح الفوقان البمبي
طيب انا مش بشرب قهوه اعمل ايه

لكن طالما فيها فايده نجرب ياست دودو
حاضر

Unknown يقول...

أنا أفضل الشاي

الفقيرة إلى الله أم البنات يقول...

عندى مبدأ لا اغيره للقهوة والنسكافيه

أحبه مها اشوف منه ومهما الناس قالت عنه

دى اخر صورة فى البوست خليتنى عماله ااقول قهوه قهوه

دعاء يقول...

شمس النهار

لو طعم القهوة مكروه قوى بالنسبة لكي ممكن تضيفى لها لبن ممكن تبقى مقبولة شوية

آنستى يا ستي

دعاء يقول...

انترنتاوي
كوب الشاي فيه من 30:70 مل كافيين
و كوب النسكافيه فيه من 60:80 مل كافيين
كانز كوكاكولا فيه من 30:45 مل كافيين
قطعة شوكولاتة 30 جرام فيه 30 مل كافيين

يعنى الكافيين بنستهلكه فى صور كتيرة مش بس القهوة المهم الكمية متزيدش عن 250:300 مل حسب الوزن.

طولت عليك بس دى نقطة كان لازم أوضحها

أسعدتنى بزيارتك

دعاء يقول...

الفقيرة إلى الله أم البنات
أنتى مش متخيلة تأثير الصورة الأخيرة دى عليا لما بحطها خلفية لسطح المكتب,بحس بالسعادة كدة.
هههههههههه
شكرا لمرورك

ومازلتُ أتعلم يقول...

أنا ولا بتجيب معايا نتيجة الحاجات ديه

الشيكولاته........عليكى بالشيكولاته
تعدل المزاج
بس تاكليها بقى وانتى لوحدك فى هدوء كده
وكله هيبقى تمام

تحياتى

أم أحمد المصرية يقول...

سؤال بريء
انت بتشتغلي في شركة قهوة
:)))))))))
بالهنا و الشفايا حبيبتي
انا شخصيا من هواة النسكافية جدا لكني توقفت عن ادمانه بسب ارتفاع ضغط الدم
تخيلي في كل الدنيا اللي عايشين فيه النسكافيه هو اللي حيرفع ضغطي
نكته مش كده :)))))

دعاء يقول...

ومازلت أتعلم
الشوكولاتة دي نعمة من نعم ربنا
لما بكون ماشية فى السوبر ماركيت فى الناحية اللى فيها الشوكولاتة بقول لنفسي اني ممكن اعيش في الركن ده ويبقى عندى اكتفاء ذاتي..هههههههه
نورتىالمدونة

دعاء يقول...

أم أحمد المصرية

إجابة بريئة
أتمنى
صحيح يعنى هو النسكافيه هو اللى هيرفع ضغطك؟
وكل اللى حوالينة ده مش هيرفعه؟
ألف سلامة وربنا يديكى الصحة

تفاصيل من حياتي كل يوم بيومه