الثلاثاء، 19 مايو 2009

الكذاب بيروح النار

عفوا.. مهما كانت أسبابك مش هسمح لك انك تكذب عليا و مهما كنت غالى عندى مش هسمح لك تكذب عليا ومهما كنت بحترمك ..كذبك ينزلك من نظرى أصل ايه.. بتتذاكى عليا مفكر انك ممكن تكذب ومعرفش أو أنك حتى ممكن تخبى ومعرفش مانا كده كده هعرف و هايبقى شكلك وحش أنا أكتر شىء مزعلنى انك تفكر فيا انى غبية أو انك ممكن تعدى بيها من غير ما أحس .................... أنتى يا صاحبتى ..مش هقول صديقتى لأنك لسه مبقيتيش و بكذبك عمرك ماهاتكوني أصل انك تفكرى و تألفى قصة حب طويلة وعريضة مليانة عذاب وغرام ومفاجآت وصدف عجيبة أقوم أنا بحسن نيتى ولأنى مش عاوزة أظلمك أقول ..ممكن..احتمال..هه بتحصل..شىء وارد لغاية متعدى حدود الكذب و توصلى للغباء طب يا ستى اكذبى على قدك وبرده ما تفترضيش فيا الغباء إيييييييييييييييييييييه إيه عالم الكذب اللى احنا عايشينه ده وللا هم الناس كلهم بقوا كدة و أنا مش واخدة بالي ............................ أنا الحمد لله عمرى ما كذبت...لأ كذبت بس فى مواقف نادرة لما أحس ان كذبى ممكن ينجى انسان من موقف صعب أو ان كذبى هيصلح بين زوجين متخانقين بس كل كذبى مش بيضر حد ولا بيجرح حد مش عشان أتسلى وللا بقصد الخداع .......................... دوسوا دوسوا وماله ماهو أنا اللي استاهل في إيه يا ناس هى الثقة بقت رخيصة عندكم قوى كدة ممكن تبيعوها فى لحظة كدة لا والله دى مش رخيصة أبدا دى غالية قوى حاولوا كدة ترجعوها تانى ..هتدفعوا دم قلبكم وبرده مش هترجع.

هناك 9 تعليقات:

نكهة مغربية يقول...

يييييييييااااااااااااااااااااايييييييييييي
و الله دنت بتتعصبي على الفاضي حتى لو كدبت عليكي متدهاش أهمية خالص
وكأنها ماكنت

متزعليش يا حبيبتي لي خسرك خسر كتير

ملكة في بيتي يقول...

شكلك مقروصة قوي

ربنا يعينك

بس صدقيني مافيش حاجة تستاهل

انا عودت نفسي اني لا اصدق حد ولا اكذبه هتفرق معايا ايه اذا كان صادق ولا كاذب مادام الموضوع مايخصنييش

في الاول والاخر هو اللي خسران

هيخسر مصداقيته ادام الناس وماعدش حد هيصدقه

ما بدقش الا اذا كان كدب في موضوع انا طرف فيه وبكذبه ده اذاني

بس برجع وبحتسب عند ربنا واحاول اخد حقي على قد ما قدر

ومازلتُ أتعلم يقول...

ياستى كله بيكذب دلوقتى
انتى بس متزعليش نفسك

وخدى بالك كويس
على فكرة الكذب بيبان فى العنين أوى

تحياتى

مامة مازن يقول...

دعاء حبيبتى يا نهار ابيض دا انا افتكرت بعد الشر حاجة تخص بيتك
يا نهار ابيض عليكى يا اختى هونىىىىىىىىىىى على نفسك
بجد
ياااه بنبقى قاعدين مع الناس وبيستهبلونا واحنا فاهمينهم يبقى نزعل ليه
انا الحاجات دى بتبسطنى قوى لانى بحس بهبل وضيق مخ اللى قدامى
روقى يا شيخة متقلبيش بوزك بقى علشان استاذ ادهم والاولاد
يلا قومى اغسلى وشك واضربى لمونتين فى الخلاط
يلا قومى انتى لسه قاعده

إيمان يقول...

عااااااااااااااااااادى ولا يهمك بتحصل كتيييييير

المهم انك متوجعيش قلبك كتير

وكويس انك مفضلتيش مخدوعه كتير

ELMASRYA - SHAMLOOLA HANEM يقول...

إيه يا جميلة؟

مين مزعلك قوي كده؟

ده انتي بسكوته خالص

هوني على روحك مافيش حاجه تستاهل تزعلي نفسك وتوجعيها بسببها

واللي بيزعلك إذا غالي عندك اتناقشي وافهمي ليه عمل كده ولكِ مطلق الحرية في الصفح أو الإبتعاد

ولو إني بفضل دايما الصفح والتسامح علشان مافيش حاجه تستاهل يا دودو

خدي بالك من نفسك ولكِ مني كل الود ومن غير كدب

دعاء يقول...

تسلموا لي يا بنات كلكم والله
انا فعلا محروقة و متكادة قوي مع ان البعض ممكن يشوف الموضوع مش مستاهل,بس بجد حاجة تزعل قوي لما حد قاعد يتكلم معاكى وتحسي انك شايفاه من جواته وهو قاعد يقول"هيه هيه ضحكت عليكى ماهو انتى غبية وممكن بسهولة استغفلك" .
أصل انا ببساطة سهل قوى اقول لها انتي كدابة بس دى مش شخصيتى ومش بحب احرج حد,يمكن دة اللى وصلنى للحالة دى .. قلة الحيلة.
نورتونى كلكم وشكرا لإهتمامكم

موناليزا يقول...

الثقة فعلا لو راحت عمرها مابترجع
بصى لو تحبى تدخلى على الرابط ده هتلاقى رأيى تفصيليا
http://monaliza110.blogspot.com/2009/03/blog-post_27.html

دعاء يقول...

موناليزا
البوست بتاعك بجد كان أكتر من رائع
و يا ريت الناس تفهم فداحة المور البسيطة اللى بيكدبوا فيها
شكرا ليكى جدا

تفاصيل من حياتي كل يوم بيومه