طرطشة ألوان : أخضر

نكمل مع أفكار للبيت بس بلون جديد

الأخضر بدرجاته

عندك 5 طرق لحياه أسهل و أبسط

الحياة مليئة بالزحام والمسئوليات والأعباء اللي بتضغط على أعصابنا و مش بتخلينا نركز في أي حاجة .ممكن نجرب 5 وسائل لتبسيط الحياه :

1-اشتري كل لوازم البيت مرة في الأسبوع ولو اللبن خلص خلال الأسبوع عادي اشربوا ميه و لو مفيش مكرونة اطبخي رز و أجلي المكرونة البشاميل للأسبوع الجاي وابقي اعملي حسابك و انتي بتشتري.كدة حتى جوزك هيرتاح من المشاوير المفاجأة أو أولادك لو كبار وبيشتروا الحاجات يوميا لما بتطلع عينهم.

2-استخدمي نتيجة أو أجندة من اللي بيتكتب فيها الحاجات اللي ناويه تعمليها خلال الأسبوع أولا عشان تفتكريها و ثانيا عشان تلتزمي بيها يعني لو ميعاد دكتور أو مواعيد دروس الأولاد أو زيارة لأحد الأقارب أو غير الأقارب (مجاملة يعني) أو حتى حاجة عاوزة تعمليها في البيت.

3-وافقي انك تعملي الحاجة اللي انتي عاوزة تعمليها بس كلمة لا مهمة جدا عشان تعيشي حياه أبسط من غير ضغوط و مش عشان في شخص او أشخاص شايفين انك المفروض تعملي حاجة او تروحي مكان يبقى لازم تعمليها و انتي بتاكلي في نفسك و تندمي كمان بعد ماتعمليها وتقولي أنا ليه ما قلتش لا.كلمة لا مش دايما غلط .

4-اليوم مقسم بطبيعته التزمي بالتقسيمة يعني اليوم طبيعي (بالنسبة لى) مقسم لــ فترة الصبح لما يبدأ الشغل و بعد الظهر لما نرجح من الشغل وفترة المساء وقت العشاء وبداية الهدوء وفترة ما بعد نوم الأولاد ( احلى وقت في اليوم ) لما البيت يكون هادئ . يبقي قسمي أعمالك مع كل وقت مناسب .و طبعا كل واحد أكيد عنده الخطوط العريضة في يومه يعني مش لازم تقسيمتي تمشي مع الجميع بس أعتقد انها مش هتختلف كتير.

5- خططي لشيء واحد في اليوم أقصد ان يكون ليومك سمة رئيسية تكون أهم حاجة في يومك النهردة زي: زيارة لازم تتم لأنك أجلتيها كتير أو أخلص شغل متأخر عندي أو أكوي كل الهدوم اللي بقالها أسبوع أو أغسل كل الشبابيك أو اشيل الهدوم الصيفي و احط الشتوي .يعني حاجة لازم اليوم ما يعديش إلا لما تخلص حتى لو هتخلص على مراحل.

لعب عيال

دي طريقة عمل عجينة يلعب بيها الأطفال نعملها بنفسنا بتبقى شبه الطين صلصال

الصور مش بتاعتي بس أنا عملتها فعلا و نجحت 100% يعني مجربة

ياله بينا على المقادير:-

1 كوب دقيق

نصف كوب ملح ناعم

1 ملعقة كبيرة زيت

1 كوب ماء

1 ملعقة كبيرة خل أبيض

ألوان طعام

الطريقة:-

هنحط كل المقادير على بعض

و نقلب

و نقلب على نار هادئة

لحد ما تمسك و تكون عجينة مش بتاخد دقيقة

نشيلها من على النار و نبدأ نعجنها

نقسمها نصفين عشان نلونهم

نضيف الألوان

في النهاية بتكون بالشكل ده

و نسيب الأولاد يلعبوا بقى و ممكن نلعب معاهم

ملاحظات:-

• بالنسبة للألوان أنا بشتري ألوان طعام من عند العطار وبآخد منها كمية صغيرة جداً في معلقة ميه

و نضيف منها بالتدريج لأنها بتلون بسرعة.

• كمان العجينة دي ممكن نحطها في كيس و نقفله كويس و نحطه في الثلاجة بيقعد مدة طويلة جدا.

• العجينة ملمسها حلو قوي و الأولاد هيحبوها وكفاية انك عارفة هي معمولة من إيه و مفيهاش مواد ضارة للأولاد و كمان  رخيصة مش بتتكلف تقريباً أقل من جنيه.

طرطشة ألوان : أحمر

أفكار للبيت

العيد جانا

بسم الله الرحمن الرحيم

السلام عليكم و رحمة الله و بركاته

كل عام أنتم بخير

و عيد سعيد بإذن الله

سلامي ليكم كلكم و بجد وحشتوني و وحشني بالخصوص الناس اللي كانو غايبين طول رمضان

يا رب ينعاد علينا كلنا بالخير

و يتقبله منا الله

عاجل جداً

السلام عليكم و رحمة الله يا جماعة في طلب عاجل في مدونة مطبخ مدام سلاموني برجاء سرعة الرد جزاكم الله خيراً

اليوم أكتب لك

اليوم لن أغضب , لن أدع شيئاً يستفزني , لن أدع أحداً يصل إلى أعصابي ولن أترك أي موقف يؤثر بي و بالتأكيد لن أبكي حتى و إن كانت دموع الفرح.حتى مع انقطاع الكهرباء في الكوافير فلن اصاب بالإحباط حتى اذا جاء أدهم غاضباً لأننا تأخرنا على الأستديو فلن أغضب منه.

لقد غضبت كثيراً و حزنت كثيراً و بكيت كثيراً خلال عام ونصف من الخطوبة التي لا أتذكر منها يوم بدون مشاكل . كل من يعرفنا كان يضع السدود و العراقيل حتى لا نصل إلى ما نحن فيه اليوم . فاليوم حبيبي وأنا سوف نحقق ما تمنيناه.

كان هذا كلامي وتفكيري في صباح يوم 7-9-2002 يوم زفافي.اليوم و قد مر على زواجي 7 سنوات بالتمام و الكمال أقول:

حبيبي ..الحمد لله أن كتب لي أن أجتمع معك تحت سقف واحد بعد أن ظننا اننا لن نجتمع. و الحمد لله على ما من الله به علينا من البنين (أحمد)ومن البنات (نور).

بارك الله لي فيك و أسعد أيامك و أضاء طريقك و وفقك في ما تسعى إليه ورزقك الله الرزق الحلال الطيب و أعطاك ما تتمنى.

اللهم في شهرك الكريم هذا أرجو رضاك عني و عن زوجي و أولادي و أن تجعلنا اللهم من عبادك الصالحين.