الجمعة، 25 سبتمبر 2009

عندك 5 طرق لحياه أسهل و أبسط



الحياة مليئة بالزحام والمسئوليات والأعباء اللي بتضغط على أعصابنا و مش بتخلينا نركز في أي حاجة .ممكن نجرب 5 وسائل لتبسيط الحياه :



1-اشتري كل لوازم البيت مرة في الأسبوع ولو اللبن خلص خلال الأسبوع عادي اشربوا ميه و لو مفيش مكرونة اطبخي رز و أجلي المكرونة البشاميل للأسبوع الجاي وابقي اعملي حسابك و انتي بتشتري.كدة حتى جوزك هيرتاح من المشاوير المفاجأة أو أولادك لو كبار وبيشتروا الحاجات يوميا لما بتطلع عينهم.



2-استخدمي نتيجة أو أجندة من اللي بيتكتب فيها الحاجات اللي ناويه تعمليها خلال الأسبوع أولا عشان تفتكريها و ثانيا عشان تلتزمي بيها يعني لو ميعاد دكتور أو مواعيد دروس الأولاد أو زيارة لأحد الأقارب أو غير الأقارب (مجاملة يعني) أو حتى حاجة عاوزة تعمليها في البيت.



3-وافقي انك تعملي الحاجة اللي انتي عاوزة تعمليها بس كلمة لا مهمة جدا عشان تعيشي حياه أبسط من غير ضغوط و مش عشان في شخص او أشخاص شايفين انك المفروض تعملي حاجة او تروحي مكان يبقى لازم تعمليها و انتي بتاكلي في نفسك و تندمي كمان بعد ماتعمليها وتقولي أنا ليه ما قلتش لا.كلمة لا مش دايما غلط .



4-اليوم مقسم بطبيعته التزمي بالتقسيمة يعني اليوم طبيعي (بالنسبة لى) مقسم لــ فترة الصبح لما يبدأ الشغل و بعد الظهر لما نرجح من الشغل وفترة المساء وقت العشاء وبداية الهدوء وفترة ما بعد نوم الأولاد ( احلى وقت في اليوم ) لما البيت يكون هادئ . يبقي قسمي أعمالك مع كل وقت مناسب .و طبعا كل واحد أكيد عنده الخطوط العريضة في يومه يعني مش لازم تقسيمتي تمشي مع الجميع بس أعتقد انها مش هتختلف كتير.




5- خططي لشيء واحد في اليوم أقصد ان يكون ليومك سمة رئيسية تكون أهم حاجة في يومك النهردة زي: زيارة لازم تتم لأنك أجلتيها كتير أو أخلص شغل متأخر عندي أو أكوي كل الهدوم اللي بقالها أسبوع أو أغسل كل الشبابيك أو اشيل الهدوم الصيفي و احط الشتوي .يعني حاجة لازم اليوم ما يعديش إلا لما تخلص حتى لو هتخلص على مراحل.

هناك 6 تعليقات:

دعاء يقول...

غالباً البوست ده مكتوب للمتزوجين بس
بس ممكن لو لسه مدخلتوش القفص و مسئولياته تتطبق الأساسيات
بالطريقة اللي هتفيدك في حياتك


تمنياتي بحياه سهلة وبسيطه

Mona يقول...

100 100

موناليزا يقول...

جميلة بجد افكارك
تسلمى ياقمر

أميرة علي كوكب مهجور يقول...

حلوة الافكار دي بس اللي معندوش اولاد و مش مجوز يعمل ايه ياريت تعملينا افكار لاوقات الفراغ اللي مهما خططنا بتفضل فاضية برضه :)

دعاء يقول...

و الله أنا بعد ما كتبته برده قلت كده أصحابي اللي لسه مش متجوزين هايزعلوا
خلاص ان شاء الله بعد سنة أو اتنين و الله أعلم كله يرجع يستفيد من موضوع كانت كاتباه دعاء مره زمان

بالتوفيق ليكم جميعاً

reem يقول...

البوست حلو اوى بجد

واكتر حاجة عجبتنى ان كلمة لأ مش دايما غلط
زدا فعلا صح جدا جدا

مدونتك عسوله خالص
وانا سعيدة بدخولى هنا وان شاء الله اكون من متابعينك دائما

ميرسي ياقمر على زيارتك الحلوة لمدونتى المتواضعة

ونورتينى بجد