الأربعاء، 23 سبتمبر 2009

لعب عيال


دي طريقة عمل عجينة يلعب بيها الأطفال نعملها بنفسنا بتبقى شبه الطين صلصال
الصور مش بتاعتي بس أنا عملتها فعلا و نجحت 100% يعني مجربة
ياله بينا على المقادير:-
1 كوب دقيق
نصف كوب ملح ناعم
1 ملعقة كبيرة زيت
1 كوب ماء
1 ملعقة كبيرة خل أبيض
ألوان طعام

الطريقة:-
هنحط كل المقادير على بعض
و نقلب
و نقلب على نار هادئة


لحد ما تمسك و تكون عجينة مش بتاخد دقيقة
نشيلها من على النار و نبدأ نعجنها
نقسمها نصفين عشان نلونهم
نضيف الألوان
في النهاية بتكون بالشكل ده
و نسيب الأولاد يلعبوا بقى و ممكن نلعب معاهم

ملاحظات:-
  • بالنسبة للألوان أنا بشتري ألوان طعام من عند العطار وبآخد منها كمية صغيرة جداً في معلقة ميه
و نضيف منها بالتدريج لأنها بتلون بسرعة.
  • كمان العجينة دي ممكن نحطها في كيس و نقفله كويس و نحطه في الثلاجة بيقعد مدة طويلة جدا.
  • العجينة ملمسها حلو قوي و الأولاد هيحبوها وكفاية انك عارفة هي معمولة من إيه و مفيهاش مواد ضارة للأولاد و كمان  رخيصة مش بتتكلف تقريباً أقل من جنيه.

    هناك 7 تعليقات:

    Mona يقول...

    وحياتك لو كان عيالى أد عيالك ماكنت عجنت لهم حاجة :))))
    ماله الصلصال ياختى :))
    أنبسطتى كده من التعليق :)))
    بس فكرة نميسة

    Mona يقول...

    نسيت أقولك موضوع التعليقات غطى على البوست الى قبله بتاع أجمل نافورات العالم محدش شافه اهىء اهىء اهىء بكاء حار(((((:

    دعاء يقول...

    ولا تزعلي نفسك يا منوووون
    علقت لك عليه مع اني عارفه انك مش مستنية تعليقات من حد

    صح

    ياله كله لوجه الله

    MOHAMMED ELBANNA يقول...

    دعاء
    بجد جميلة الفكرة
    ربنا يبارك فيكي ويوفقك للخير
    محمد البنا
    طريق النجاح

    اقصوصه يقول...

    شكلها حلوه وايد

    مشكوره ع الطريقه :)

    دعاء يقول...

    محمد
    شكراً لزوقك
    عقبال ما تقعد انت و زوجتك تعكعكوا وتجربوا في حاجات للأولاد

    كل سنة وانت طيب

    دعاء يقول...

    اقصوصه

    شكراً لتشريفك المدونة بالزيارة
    و يا رب تنوريني تاني