لازم لازم لازم

حسبنا الله و نعم الوكيل

الظاهر اننا فعلاً و لازم و لابد اننا نتتطهر

ندخل المحرقة علشان ننضف و نخرج منها ناس تانيين

انتخابات مجلس الشعب 2011

الإقبال على الانتخابات السنة دي بجد حاجة تفرح 

مش مشكلة مين ينجح 

المهم ان أنا شفت ناس أول مرة تنزل انتخابات 

عشان صوتنا زمان كان مالوش تأثير 

النهردة الناس بتقول أنا عارف إن صوتي هيعمل فرق 

و ده في حد ذاته نجاح للثورة 

و دليل على ان الوعي عند المصريين فعلاً اختلف عن زمان 

يا رب تكمل على خير

و لسة هنقول تاني

 في شاشة التليفزيون 

ببص قوي

ببحلق

ببرق

بتنح 

بسأل 

هي الأحداث دي جديدة 

وللا إعادة للقطات من 25 يناير 

يرد ويقوللي 

لأ

دي أحداث النهردة 

الدخان و العربيات و الإصابات و القتلى 

كل ده جديد 

أمال كنا بقى لنا 10 شهور بنعمل إيه 

أنا كنت مفكرة اننا غيرنا حاجة 

أتارينا اتضحك علينا بالقوي 

قالولنا دي مصر جديدة

من غير قمع

من غير قتل 

من غير ظلم 

فيها حرية 

ديموقراطية

و اللي كان بيحصل كان حالات فردية 

مش هي دي الأغلبية 

بجد أنا عاوزة حد يفهمني

مين بيحكم مصر دلوقتي

و دي سياسات مين 

مين اتجرأ تاني و ضرب تاني 

و موت تاني 

دخان تاني و مطاطية تاني و خراطيش تاني 

و بلطجية تاني 

 و إعلام مصري تاني

و مش مصدقيني لما أقولكم ان دي 

لقطات بتتعاد من جديد .

و أرجع و أقول

الجيش و الشرطة إيد واحدة

على الشعب المندث

أضحى مبارك

عيد سعيد علينا يا رب

ونشوف بلدنا في أحسن حال 

يا رب  

 

اصنعي أساسيات أكل البيت بنفسك

مع ان زمان كانت كل حاجة بتتعمل في البيت زي ما بيقولوا الخزين بتاع البيت أو المونة باللبناني, دلوقت بنلاقي حاجات قليلة قوي ممكن نفكر نعملها في البيت ,و كمان ممكن أول محاولة تفشل فشل خطير و تسمعي من جوزك أو أولادك أو ممكن مامتك و أخواتك لو انتي لسة مش متجوزة تعليقات تصد نفسك انك تحاولي تاني أو انك تغيري لوصفة تانية.

أول مرة عملت فيها عيش توست العيش طلع تقيل و مكتوم تقولش طوبة.و قلت ساعتها ادي العيش لخبازه و فييييييييين لما تجرأت تاني و جربت وصفة تانية وتالتة وغيرت نوع الخميرة ونوع الدقيق لحد ما وصلت للطريقة و للشكل و الطعم اللي يرضيني وبقيت بدل ما أشتري عيش عبارة عن شوية هوا بآكل عيش عاملاه بنفسي أتقل شوية بس ليه طعم و ريحة لا يمكن تلاقيها في الجاهز و عندي امكانية اني أعمله أبيض أو بالقمح الكامل أو أكتر فيه الرده شوية زي ما أنا عاوزة.

لما نعمل أساسيات البيت بنفسنا مش بالضرورة انه يكون عشان نوفر أو بيكون أرخص ( مع ان ده من ضمن الأسباب المهمة) بس كمان عشان بيكون صحيا أفضل حتى لو مش هتوفري ولا قرش . بس بجد في حاجات بتتعمل في البيت تتفوق بجدارة على أي حاجة ممكن نشتريها من السوق ( غذائياً ) كل اللي علينا اننا نعملها. أنا فعلا تدريجيا بدأت أعمل حاجات كتيرة قوي بنفسي.أهم حاجات و الأفضل مقارنة بمنتجات السوق بدون جدال هي...

الزبادي البيتي   

 و هو من الأغذية المفيدة جداً و الغني بالكالسيوم و البروتين سهل الهضم و بيعالج الانتفاخ.وسهل قوي و سبق و عرفنا الطريقة.

  

العيش التوست و عيش السندوتشات و البرجر 

صدقوني لو جربتوا تعملوه عمركم ما ها ترجعوا للي بيتباع في المحلات.و إن شاء الله أعمل موضوع فيه وصفة لذيذة و مضمونة النجاح.





مرقة الدجاج

مش بالمعنى الحرفي زي ماجي أو فاين فودز , لا المرقة اللي بتطلع لما بنطبخ الفراخ و اللحمة و العظام.و دي بنستخدمها في حاجات كتيرة قوي زي المحشي و الأرز بأنواعه وكمان كأساس لأنواع شوربة لذيذة و مغذية. ممكن تكون بواقي أو نعمل كمية و نحفظها في الفريزر لوقت الاستعمال.


المخبوزات و الحلويات

ممكن تقولوا انها مش من أساسيات البيت قوي بس لازم بناكلها حتى لو على فترات و دي بقى بتعتمد على الأنواع المفضلة لكل واحد أو الحالة الصحية . الحلويات الشرقية و الغربية, بسبوسة , كنافة, قطايف, تورتة, كيك, براوني , مهلبية, رز باللبن, و طبعا الكحك والبسكوت يعني كل واحد و رغبته و امكانياته و(صحته).و هتكون أكيد أحلى و أصح لأننا بنتحكم في كمية السكر و الدهون اللي بتدخل فيها.


طبعا مينفعش نتكلم عن أساسيات البيت من غير ما نتكلم عن الزيتون المخلل واللفت و الجبنة والسمنة و الزبدة وكل الحاجات الجميلة دي اللي الناس زمان و دلوقت بتعملها , بس دي عاوزة موضوع لوحدها. ضيق الوقت بيمنعنا اننا نعمل حاجات كتير بنتمنى نعملها.


يا رب كل البيوت تكون عامرة بالخير و يكون البيت زي زمان مكان للحب و الدفئ و الأكلات الجميلة اللي بتدفي الروح قبل البطن.

تذكير لنفسي

تذكير بسيط لنفسي و ممكن لغيري علشان انا دايما بنسى , العالم مش بيدور حواليا انا لوحدي, أي علاقة عبارة عن طرفين سواء كانت علاقة زوجية أو أخوية أو صداقة أو علاقتي بأولادي .كتير بنبص للأمور بنظرة أنانية قوي من غير ما ناخد في الاعتبار وجهة نظر الطرف التاني في العلاقة. دايما بطلب و دايما عاوزة كل حاجة تمشي بطريقتي أنا ( و انا عارفة اني دايماً بكون انا الصح )  بس أحياناً الصح بيكون له أكتر من طريقة .عشان كده لازم يكون في مرونة أكتر.شيء جميل لما الناس تتعامل من غير أنانية, مع ان الأنانية مش بالضرورة بتعبر عن انسان سيء من جواه, لأ , هو بس مش واخد باله انه بكده  بيزود المسافات بينه وبين الآخرين.

أفضل الطرق لتخفيف التوتر و الضغط العصبي

طرق بسيطة بتساعدنا اننا نخفف ضغط الحياه علينا و ممكن من خلالها نعيش حياة أبسط و أسعد:

طلب المساعدة ,
أجمل حاجة انك لما تحس ان نفسيتك تعبانة أو ان عندك مشكلة مش لاقي ليها حل انك تدور على أقرب شخص ليك ترمي همومك بين ايديه, ممكن يكون صديق أو صديقة مقربة أو زوج أو زوجة أو أم أو أب أو أي شخص مقرب ليك و موثوق فيه.ساعتها بتحس براحة حتى من مجرد الكلام و الفضفضة أو حتى البكاء في حضنه.

النوم الصحي,

كلنا نعرف ان الإنسان البالغ محتاج 7-8 ساعات نوم يومياً .اعمل حسابك انك تنام بعمق لأنك لما تكون مرتاح كويس الجسم و العقل بيكونوا في أحسن الأحوال و مستعدين لتقبل الحياة بشكل أفضل و مواجهة الضغوط اليومية بشكل أكثر حكمة. قيلولة صغيرة عميقة (نصف ساعة) ممكن كمان يكون ليها مفعول ساحر في تحسين الحالة المزاجية.

التنفس العميق ,

لما تواجه موقف صعب أو مشكلة , تنفس بعمق و ببطيء عدة مرات ممكن 10 مرات بس , انخفاض مستوى ضربات القلب و انتشار الأكسجين في الدم بيساعد على خفض التوتر .

المشي ,
10 دقائق مشي كل يوم نصيحة بنسمعها كتير نتيجة لفوائد المشي و الحركة على الصحة و تخفيف الوزن. بس كمان لما بنمشي بنفكر بعمق خاصة لما بنكون لوحدنا , فكر في الحاجات اللي بتسعدك أو في أشخاص بتحبهم  و يا سلام لما تعيش حلم من أحلام اليقظة و انت ماشي لما بتتخيل ان حلم من أحلامك بيتحقق.كل دي حاجات بتساعد على خفض التوتر و الشعور بالسعادة.

طريقة عمل البراوني BROWNIES

 

• المكونات: 

• 85جرام شوكولاتة غامقة (Dark) مقطعة

• 1/2 كوب زبدة

• 1 كوب سكر ناعم , 1/4 ملعقة صغيرة ملح

• 2 بيضة بحرارة الغرفة

• 1 كيس فانيليا

• 3/4 كوب دقيق

• 3/4 كوب قطع شوكولاتة بيضاء أو باللبن ( اختياري)

•  الطريقة:

   

  

                 نفرش ورق حراري في صينية

  نبدأ بتسخين الفرن لحرارة 180 درجة , نفرش ورق حراري في صينية مستطيلة أو مربعة صغيرة و ندهنها بالزيت دهناً خفيفاً.

  

   

   في إناء على نار هادئة نضع  الزبد الشوكولاتة مع التقليب حتى تذوب ,حوالي 4 دقائق , ننقلها من على النار ثم نضيف السكر و الملح و نخلط .

  نضيف البيض و الفانيليا ونقلب حتى يختلطوا , نضيف الدقيق ونقلب حتى يختفي الدقيق  , نقلب قطع الشوكولاتة (إذا استخدمتها) .

  نضع الخليط في الصينية و نفرده و توضع في الفرن وتخبز حوالي 30 دقيقة أو حتي نختبرها بعود خشبي و يخرج نظيفاً و لا نبالغ في الخبز حتى لا تصبح جافة.

   

  

            نرفع البراوني من الصينية باستخدام ورق الفويل

  نترك الصينية حتى تبرد تماماً و نرفع البراوني من الصينية باستخدام ورق الفويل و تقطع و تقدم مع كوب من اللبن أو فنجان قهوة يميييييي.

  

   

   

   و بالهنا و الشفا 

   

مدونتي العزيزة

بسم الله الرحمن الرحيم

وحشتيني

عارفة اتأخرت عليكي

بس و الله ما نسيتك

كنت ببص عليكي كل شوية

و أطمن عليكي 

من بعيد لبعيد يعني

خايفه حد يشوفني 

و يقولي كنتي فين؟

بكره السؤال ده

أنا موجوده

بس بحور الدنيا كتيرة

اللي حصل اني ......

تهت شوية

ياله قولي انك مسامحاني

نفس ارجع لك تاني

عندي حاجات كتيرة عاوزة أقولهالك

نور و أحمد بيسلموا عليكي

أفكاري ملخبطه

بس قلت لو مكتبتش دلوقت 

يمكن شجاعتي تخوني و معرفش أكتب حاجة

ممكن يكون مفيش حد بيسأل عنك

بس حبايبي دايماً بيسألوني عنك 

وبرده يقولوا

انتي فين؟

قلت محدش يسألني السؤال ده

المهم اني جيت و إن شاء الله ماأتوهش تاني

إلى اللقاء

اللهم ارحم شهداء مصر